The obituary notice of Dorothy Mary JONES

Cefais bleser o fod yng nghwmni Dorothy sawl tro ers i mi ei chyfarfod y tro cyntaf yng nghanol y saithdegau.
Digwyddais fod yn ei chwmni pan glywsom ein dau y bu farw cymydog annwyl ac agos iddi fu'n gyn-siopwr a post-feistr yn Llangwm am ddegawdau. Wrth roi teyrnged fer i'r diweddar bost-feistr, meddai Dorothy wrthyf, "Wyddost di, tydi popeth ddim ar ben pan gollwn anwyliaid? Maent yn gadael gwaddol ar eu hôl sydd yn aros. Sylwa mor aml bydd coeden yn ail-flaguro ar ôl dymchwel." Yn sicir, bydd gwaddol Dorothy yn aros ar aelwydydd ei theulu, Bro Uwchaled ac ymhellach na hynny hefyd.
Bu'r geiriau yn gysur personol i mi sawl tro ar adegau trist o golli ffrindiau neu deulu. Cymaint felly, nes i mi roddi neges gysurlawn Dorothy mewn dwy bennill fel y gallent fod yng gysur i eraill.

Nid bob tro daw coed i derfyn
Wrth i lif neu storm eu disgyn.
Yn eu bôn bydd ailflaguro'n
Codi calon a chysuro.

Rhywbeth tebyg ydi bywyd
Ar ôl colli un anwylyd.
Y mae atgof a phob gwaddol
Yma efo ni'n wastadol.
-------------

Diolchwn am oes hirfaith
y wraig dda gydol ei thaith.

Cwsg Mewn Hedd Dorothy.